我其實諗左好一段時間先決定用粵語口語寫文章，因為我份人比較old school鍾意啲原始既野，但同時中文又超低分，所以而家多左人接受口語文章我先決定寫下野。
以前，岩岩互聯網出現既時候，大家ＭＳＮ打字都仲會用書面語，後來慢慢演變成用口語，再去到後期連文章都有唔少係用廣東話寫。
曾經有唔少人唔鍾意呢個「本土流行文化」，覺得用口語寫文章會影響中文水平，或者可以講影響埋中文文化。我原先都多少係咁諗，但到最後我發現，其實文字為既都只係傳達意識、內容同情感。口語與否其實唔太重要，重要既係內容有冇意義，睇完你有冇得着。
如果只因為你唔鍾意睇書面語文章而冇閱讀習慣，換過來用口語寫你會岩睇既話，咁口語既文章其實有佢可取既地方。係～可能你既中文真係會差左，我唔敢擔保，但只要你肯閱讀文章，就點都會有所得着掛。
陰謀論啲咁講，係啲「中文人」想維持既有利益同地位先會企硬唔比口語文出現。人始終都係自私既。
唔陰謀論咁講，佢地都係想保留傳統中國文化姐。
反正我覺得語言及文字，為既只係傳達一己意思，進化定退化睇你點睇。
而除左文字之外，世界上仲有好多其他野既。
